అదేమిటో కానీ, నిన్న రాత్రి 11.30 తరువాత దేశం అంతా ఓ శ్మశాన నిర్లిప్తత ఆవహించింది. కారణం అందరికీ తెలిసిందే. ఏదో ఇంట్లోవాళ్ళెవరో పోయినంత బాధపడిపోతున్నారు. ఏమయిందిటా, అదేదో T20 World Cup లో మనవాళ్ళని, afterall West Indies ఓడించిందిట. So what? ఆయినా మన అభిమానులది ఓ వేలం వెర్రి–పాకిస్తాన్ ని ఓడించేసరికి Champion అయిపోయారనుకున్నారు.కెప్టెన్ గారి కూతురు నిద్రకూడా చెడకొట్టారు పాపం. బంగ్లాదేశ్ తో చావు తప్పి కన్ను లొట్టోయింది. అతనెవరో గుండె ఆగి పోయాట్టకూడానూ, ఆ ఉత్కంఠభరిత ముగింపు భరించలేక. అప్పుడు నెగ్గితే, మనంతటివాళ్ళు లేరనీ, ఆ కొహ్లీయో ఎవరో, దేశానికి అదేదో వెన్నెముక అనీ, తన girl friend ఇతన్ని వదిలేసి చాలా మంచిపనిచేసిందనీ, ఏమిటో ఏమిటో అనేశారు. పైగా ఆ మ్యాచ్ లో మన ఇంగ్లీషు commentators, మనవాళ్ళని మానేసి, ” శత్రు పక్షం” వారినే పొగిడారని ఈ సెలెబ్రెటీసులకి కోపంకూడా వచ్చేసింది.” శత్రు పక్షం ” అని ఎందుకన్నానంటే, మన ఎగస్ పార్టీవాడు, మనకి శత్రువే అని , మన దేశ నాయకుల ఉవాచ. అందుకనే కాబోలు నిన్నటి match లో, చివరి ఓవర్ కి, ఆ కొహ్లీ బాల్ తీసేసికున్నప్పుడు, అప్పుడెప్పుడో, భారతరత్న గారు ఇలాటి పరిస్థితుల్లోనే, ఇ‍క్ష్వాకుల కాలంలో, తనే బాల్ తీసేసికుని, బౌలింగు చేసి, మన జట్టుని నెగ్గించారట. So what?. చివరి ఓవరో, అంతకుముందుదో, మైదానం బయటకి వెళ్ళిన బంతిని లోపలకి విసిరేసి, ఇంకోడెవడో పట్టుకుని, ఎపీల్ చేయడం. బౌండరీ ని చేతిలో బాల్ ఉండగా తాకినట్టు ఆ పట్టుకున్నవాడికీ తెలుసు.. అయినా ఎపీల్ చేయడం.. లక్కుంటే ఔటిచ్చేస్తారు అనుకునే కదా? అయినా కొత్త టెక్నాలజీ ధర్మమా అని అసలు విషయం బయట పడింది. ఇంకో సంగతి– Chris Gayle ఔటవగానే మ్యాచ్ నెగ్గేసినంత హడావిడి చేసేశారు. తను పోతే ఇంకోడొస్తాడనే విషయం మర్చిపోయి. మనకున్నట్టే, ప్రతీ జట్టులోనూ ఎవరో ఒక Rescuer ఉంటాడని మర్చిపోయారా?
ఆడేవాళ్ళ కంటే , మనదేశంలో వ్యాఖ్యానించేవారే ఎక్కువ. న్యూజిలాండ్ తో ఓడిపోతే, ” ఏమీ ఫరవాలేదూ.. ఇదివరకోసారి మొదటి match లో ఇదే న్యూజిలాండ్ తో ఓడిపోతే, అప్పుడు మనం finals నెగ్గామూ.. ఇదో శుభసూచకమూ అన్నా, మనవాళ్ళకే చెల్లింది.. ” ఆట ని ఆట ” లా చూడ్డం మనవాళ్ళకి ఎప్పుడొస్తుందట?
ఇవన్నీ ఒకెత్తైతే, ఇంకో గమ్మత్తు.. ప్రస్థుత కెప్టెన్ వల్లనే, తన కొడుకుని పైకి రానీయడం లేదని, ఓ ఆటగాడి తండ్రిగారి ఉవాచ.. ఇదివరకటిరోజుల్లో ఓ ఆటగాడి తల్లిగారొచ్చేది. ఇప్పుడు ఇంకో ఆటగాడి తండ్రి.. పైగా కెప్టెన్ గారిని, కమండలంలోంచి నీళ్ళు తీసి శపించేశాడు కూడానూ…. ” చూస్తూ ఉండండి.. ఈ దుర్మార్గ కెప్టెన్ రోజులు దగ్గరకొచ్చేశాయి.. వీడు వెళ్ళడం ఏమిటీ, మావాడెలా దూసుకొస్తాడో..” అంటూ.. పైగా ఆ తండ్రిగారి పుత్రుడుగారు, ఒకానొకప్పుడు చేసే అదేదో Revital యాడ్ ని కాస్తా, ఇప్పుడు కెప్టెన్ గారు చేస్తున్నారు. Needle of suspicion points to….ఆ poor తండ్రి అన్నాడంటే అనడు మరీ? ఇంత అన్యాయమా?.
మనదేశంలో ఉండే ఇంకో సదుపాయం ఏమిటంటే, ఎన్ని Match Fixings ఆరోపణలుండనీయండి, ఏమీ ఫరవాలేదు. ఇదివరకు ఒకాయన పార్లమెంటు సభ్యుడయ్యాడు. ఇప్పుడేమో ఇంకోడు వచ్చే కేరళ ఎన్నికల్లో అధికార పార్టీ తరఫున పోటీ చేస్తాడట.. ఇవన్నీ अछ्छे दिन కి శుభసూచకాలు కాపోతే మరేమిటీ?
అయ్యా ఇదీ విషయం. మన జట్టు ఎలాగూ బయటకొచ్చేసింది. ఇంక ఒక్కడూ టీవీ పెట్టడు. ఎవరి పనులు వాళ్ళు చేసికుంటారు.
శుభం భూయాత్…
